Трамп најави можност за нов голем напад врз Иран: „Поголем од кога било“

Американскиот претседател Доналд Трамп изјави за „Аксиос“ дека сериозно размислува повторно да започне големи воени операции против Иран, вклучително и напади што би биле поголеми од оние изведени во операцијата „Епски бес“.

Во краток разговор за американскиот медиум, Трамп призна дека таквата одлука би имала сериозни последици, но нагласи дека сѐ уште не донел конечна одлука. Тој не прецизираше кога би можел да одлучи дали ќе нареди нова воена акција.

Двајца американски претставници, исто така, потврдиле дека засега не е донесена никаква одлука и дека на војската не ѝ се издадени нови наредби.

Досегашната ескалација веќе доведе до тоа цената на нафтата да надмине 100 долари за барел, а евентуалното враќање на отворена војна е непопуларно меѓу американската јавност.

„Размислувам за огромен напад. Поголем од кога било досега. Блиску сум до донесување одлука. Сѐ е подготвено за тоа“, изјавил Трамп.

Тој додал дека Израел „би се приклучил за две минути доколку биде побарано“, но нагласил дека САД „не им треба никој“ за да започнат нова операција против Иран.

Трамп предупредил и дека евентуалното учество на Израел во нападите би имало последици, алудирајќи на можна иранска одмазда врз Израел.

Според него, Иранците сакаат да преговараат, но моментално не се подготвени за договор.

„Сѐ уште не пропатија доволно“, рекол американскиот претседател.

Два регионални извори запознаени со обидите за посредување изјавиле дека иранското раководство не го прифатило последниот предлог што му бил понуден.

„Се обидуваме, но Иранците не помагаат“, рекол еден од изворите.

Во меѓувреме, Соединетите Американски Држави во изминатите 12 дена ги интензивираа нападите со цел да ги запрат иранските акции врз трговските бродови во Ормутскиот Теснец. Според „Аксиос“, Иран досега не покажал подготвеност да ја промени својата политика, туку дополнително ги засилил нападите во регионот.

Во исто време, хутските бунтовници во Јемен, кои имаат поддршка од Иран, почнале да напаѓаат саудиски бродови во Црвеното Море, што дополнително ги зголемува тензиите на уште една клучна рута за транспорт на нафта и создава нов притисок врз глобалниот енергетски пазар.

Трамп на својата социјална мрежа „Трут соушал“ порача дека, доколку хутите повторно нападнат бродови во Црвеното Море, Соединетите Држави ќе го сметаат Иран за одговорен.

„Хутите се ирански посредници и поради тоа Иран, а секако и самите хути, ќе бидат жестоко воено казнети“, напиша тој.

Одделно, Трамп изјави дека израелскиот премиер Бенјамин Нетанјаху сака следната недела да присуствува на комеморацијата за починатиот сенатор Линдзи Греам во Вашингтон.

„Односите со Биби се многу добри. Ќе се сретнам со него ако биде овде“, изјави Трамп.

Текстот Трамп најави можност за нов голем напад врз Иран: „Поголем од кога било“ е превземен од МАКФАКС.