Турција побарала помош од британската тајна служба за заштита на сирискиот претседател

Турската разузнавачка агенција минатиот месец побарала од британската MI6 да преземе поголема улога во заштитата на сирискиот претседател Ахмед ал-Шара, по серијата неодамнешни заговори за атентат, изјавија пет лица запознаени со ова прашање.

Овој потег укажува на напорите на странските сојузници да ја стабилизираат земјата, која сè уште се соочува со спорадично насилство 15 месеци по соборувањето на претседателот Башар ал-Асад, додека војната меѓу САД, Израел и Иран дополнително го потресува целиот регион. Сојузниците го гледаат Шара како клучна фигура во спречувањето на враќање на конфликт или граѓанска војна, која расели милиони бегалци за 14 години и ѝ дозволи на Исламска држава да заземе големи делови од Сирија, пишува Ројтерс.

Милитантите ги засилија нападите врз воениот и безбедносниот персонал низ цела Сирија во изминатиот месец и го прогласија Шара, поранешен бунтовник, за свој „непријател број еден“. Турција, Велика Британија и САД го поддржаа Шара во неговиот обид за повторно обединување и обнова на земјата од 26 милиони луѓе минатата година.

Лондон и Вашингтон оттогаш ги укинаа повеќето санкции врз Сирија и Хајат Тахрир ал-Шам (ХТС), исламистичката група што Шара некогаш ја водеше. Не е познато точно што побарала Националната разузнавачка организација на Турција (МИТ) од МИ6.

Турски извор изјави дека МИТ, која игра клучна улога во воспоставувањето на новата влада, се обратила до МИ6 за дополнителна помош по инцидентот минатиот месец. Висок сириски безбедносен извор потврди дека барањето следело по „заговор за атентат со висок ризик“ и додаде дека разузнавачките служби на трите земји постојано разменувале информации.

Западен разузнавачки извор верува дека Турција сака западно присуство во Дамаск како тампон-зона помеѓу турските и израелските агенции. Изворите побараа анонимност поради чувствителноста на темата, а надлежните институции во Турција, Велика Британија и Сирија не одговорија на барањата за коментар.

Текстот Турција побарала помош од британската тајна служба за заштита на сирискиот претседател е превземен од МАКФАКС.