Црна Гора за заштита на бегалците од Украина ќе одвои два милиони евра

Владата на Црна Гора на вчерашната седница донесе одлука да издвои два милиони евра за спроведување на Одлуката за давање привремена заштита на лица од Украина.

Донесена е Одлуката за формирање на Координативно тело за надзор над спроведувањето на Одлуката за давање привремена заштита на лица од Украина.

Во Одлуката се дефинира дека Координативното тело ги следи и координира активностите и мерките што ги преземаат надлежните органи и институции во насока на спроведување на Одлуката, односно остварување на правото на лица од Украина на сместување, здравствена заштита, основно и средно образование, информирање за правата и обврски, работа, спојување семејства, документи и право на барање за меѓународна заштита, како и соработува со меѓународните организации кои се занимаваат со правата на бегалците и мигрантите и Црвениот крст на Црна Гора.

– Во оваа насока, Владата одобри пренасочување на средства од единицата за трошење Министерство за финансии и социјала во единицата за трошење МВР во износ од 2.000.000 евра за спроведување на Одлуката за давање привремена заштита на лица од Украина – соопштија од Владата.

Според ОН, повеќе од десет милиони луѓе ја напуштиле Украина од почетокот на руската агресија.