Шпанија го затвора воздушниот простор за американски авиони вклучени во војната со Иран

Шпанија го затвори својот воздушен простор за американски авиони вклучени во нападите врз Иран, чекор понатаму од претходната забрана за користење на воени бази што тие заеднички ги управуваат, изјави министерката за одбрана, Маргарита Роблес.

„Не дозволуваме користење на воени бази или користење на воздушниот простор за дејствија поврзани со војната во Иран“, изјави Роблес за новинарите во Мадрид.

Затворањето на воздушниот простор ги принудува воените авиони да ја заобиколат Шпанија, членка на НАТО, на пат кон нивните цели на Блискиот Исток. Ова не ги вклучува вонредните ситуации, објави весникот „Ел Паис“.

„Ова е дел од одлуката што веќе ја донесе шпанската влада да не учествува или да не придонесува во војна што се започнува еднострано и спротивно на меѓународното право“, изјави министерот за економија, Карлос Куерпо, за радио „Кадена СЕР“.

Шпанскиот премиер, Педро Санчез, е еден од најгласните противници на нападите на САД и Израел врз Иран, опишувајќи ги како неодговорни и нелегални.

Доналд Трамп се закани дека ќе ја прекине трговијата со Мадрид откако земјата одби САД да ги користат базите во Шпанија за војната на Блискиот Исток.

 

фото/Depositphotos

Текстот Шпанија го затвора воздушниот простор за американски авиони вклучени во војната со Иран е превземен од МАКФАКС.