Светската автомобилска федерација потврди седум производители кои ќе учествуваат со своите болиди во новата сезона во Формула Е и ќе произведуваат напредни електрични автомобили од новата генерација

По претходното соопштение дека новите Формула Е ќе бидат енергетски најефикасните тркачки автомобили во историјата, Светската автомобилска федерација (ФИА) сега потврди кој ќе ги произведува и откри неколку нови технички детали за електричните болиди од третата генерација. ABB FIA Формула Е светското првенство следната сезона ќе има обединети и многу атрактивни електрични автомобили, чии тизер фотографии беа објавени кон крајот на минатата година. Болидите ќе бидат официјално претставени пред јавноста на 28 април во Монако.

Сега е откриено дека ќе ги произведуваат DS Automobiles, Jaguar, Mahindra Racing, Maserati, NIO 333, Nissan и Porsche – многу познати имиња од автомобилскиот свет. Подоцна оваа година треба да дознаеме како ќе изгледа стартната мрежа, т.е. кои сите тимови ќе учествуваат во следната генерација на напредни трки со електрични автомобили.

Уште еднаш е потврдено дека Ген3 болидите на Формула Е ќе бидат енергетски најефикасните тркачки автомобили, кои самостојно ќе генерираат најмалку 40% од тркачката енергија преку системот за регенеративно сопирање. Производителите се договорија регенеративното сопирање да се врши на двете оски: на предната оска ќе има регенеративен систем за сопирање со моќност од 250 kW, а на задната со 350 kW – давајќи вкупна регенеративна моќност од 600 kW.

Тоа е повеќе отколку што електромоторите на новите болиди ќе имаат моќ да ги стартуваат. Тие треба да се декларираат на 350 kW, односно 470 КС. Ваквите карактеристики ќе им овозможат на болидите да постигнат максимална брзина од 320 km/h. Погонскиот систем, ако го погледнете односот маса-моќ, ќе биде двојно подобар од моќноста на споредлив мотор со внатрешно согорување.

Високата моќ на регенеративното сопирање, задно и предно, исто така ќе им овозможи на новите болиди воопшто да ги немаат класичните хидраулични сопирачки на задните тркала. Наместо тоа, задната оска ќе биде сопирана само со регенеративен систем, што исто така ќе биде една мала револуција во автомобилизмот. Новите болиди ќе имаат и помала вкупна тежина. Сето ова треба да придонесе за поголема привлечност на ваквите трки, возбуда на патеката и поостра борба меѓу натпреварувачите.