Украина развива единствена мрежа базирана на вештачка интелигенција која би ги поврзувала податоците од бојното поле, системите за оружје и командните структури.


Ова значително би го забрзало донесувањето одлуки во воените операции, изјави Данило Цвок, раководител на Истражувачкиот центар за вештачка интелигенција при украинското Министерство за одбрана.

Украина веќе користи вештачка интелигенција за различни функции на бојното поле, вклучувајќи летање со беспилотни летала до цели, помагање во планирањето на борбените операции и обработка на податоци за руските ракетни напади, објави Ројтерс.

„Вештачката интелигенција ќе формира нова парадигма на војување. Таа веќе активно го прави тоа“, рече Цвок.

Цвок рече дека системите за вештачка интелигенција наскоро ќе бидат обединети во единствена мрежа која го следи бојното поле, што ќе доведе до „војна на оперативни системи“ со Русија во следните три до пет години ако конфликтот продолжи.

„Системот има повеќе податоци и подобро разбира, предлага решенија. Тој систем ќе добие предност во однос на другиот“, додаде Цвок.

Целта, рече тој, е да се создаде единствен оперативен систем кој би препорачувал одлуки на бојното поле, од нивото на поединечни единици до стратешката команда.

Таквиот систем значително би ја подобрил анализата на податоците од фронтовската линија долга 1.200 километри и би овозможил побрзи препораки до човечките команданти, а воедно би ги обединил оружјата и системите за податоци во „еден жив организам што може да дејствува на координиран начин“.