Четботот Grok, во сопственост на компанијата на милијардерот Илон Маск, ја ограничи функцијата за генерирање и уредување слики исклучиво на претплатници кои плаќаат за социјалната мрежа X.


Ова дојде по глобалните критики за можноста за создавање дипфејк порнографска содржина, вклучувајќи слики од жени и малолетници, пишува Euractiv.

При обид да се генерираат слики преку платформата X, Grok сега ги информира корисниците дека оваа функција е достапна само за претплатници што плаќаат и ги поканува да се регистрираат за „премиум“ верзијата на X.

Сепак, не е прецизирано дали постојат дополнителни ограничувања за претплатниците кога станува збор за генерирање сексуално експлицитна дипфејк содржина.

Grok во последниве денови беше критикуван од регулаторите поради неговиот таканаречен „зачинет“ начин на работа, кој овозможува создавање дипфејк, сексуализирани слики, вклучувајќи слики од малолетници.

Затоа, европските пратеници и некои земји-членки повикаа на построги мерки против ваквите технологии.

„Ова е нелегално“, рече портпаролот на Европската комисија за дигитални прашања, Томас Рејниер.

Европската комисија му наложи на X да ги зачува сите интерни документи и податоци поврзани со Grok до крајот на 2026 година, користејќи ги овластувањата според Законот за дигитални услуги (DSA), кој го става X меѓу платформите што се предмет на најстрог надзор од ЕУ.

Комисијата сè уште не започнала нова формална истрага за X во врска со случајот со дипфејк порнографија.

Тестовите спроведени од Euractiv покажаа дека Grok, кога му се пристапува како на самостојна апликација, а не преку платформата X, сè уште може бесплатно да генерира слики врз основа на барањата на корисниците.