Microsoft размислува за покренување судска постапка против својот партнер OpenAI и Amazon поради нивниот договор од 50 милијарди долари, објави „Фајненшл тајмс“ (FT).


Причината е што може да се прекрши ексклузивниот договор за cloud computing помеѓу Microsoft и OpenAI, објави „Ројтерс“.

Неодамна, Amazon и OpenAI потпишаа неколку договори, вклучувајќи еден што го направи Amazon Web Servises (AWS) ексклузивен снабдувач на услуги за Frontier, деловна платформа за градење и покренување AI агенти, која ги покренува токму OpenAI.

Спорот се фокусира на тоа дали OpenAI може да го понуди Frontier преку AWS без да го прекрши партнерството со Microsoft, кое бара до моделите на стартапот да се пристапува преку Azure, cloud платформата на производителот на оперативниот систем Windows, објави FT, повикувајќи се на извори.

FT објави дека раководителите на Microsoft веруваат дека пристапот не е изводлив и дека би го прекршил духот и текстот на нивниот договор, додавајќи дека компаниите преговараат за решавање на спорот без судски постапки пред лансирањето на Frontier.

Microsoft беше еден од најраните инвеститори во OpenAI, инвестирајќи 1 милијарда долари во компанијата во 2019 година и 10 милијарди долари до почетокот на 2023 година.

Во септември минатата година, двете компании потпишаа необврзувачки договор според новите услови на односот, давајќи му на OpenAI можност да склучува договори со компании како што се Nvidia, Amazon и Softbank.

Во заедничка изјава Microsoft и OpenAI забележаа дека Microsoft ја задржува својата „ексклузивна лиценца и пристап до интелектуалната сопственост во моделите и производите на OpenAI“ и дека Azure останува ексклузивен снабдувач на услуги за cloud computing за моделите на OpenAI.