Tinder воведува нова функција што им овозможува на корисниците да се сретнуваат и да организираат групни излегувања, во обид да привлече помлади корисници и да го запре падот на бројот на членови.


Функцијата „Group Hangouts“ (Групни дружења) му овозможува на корисникот да избере активност, а потоа да покани најмалку двајца пријатели. Откако групата ќе има најмалку тројца членови, нејзиниот профил може да биде прегледан и „лајкнат“ од други групи.

Доколку најмалку еден член од секоја група возврати на интересот, групите се поврзуваат во заеднички разговор (чет) каде што можат да договорат средба.

Со овој потег, Tinder се обидува да го промени традиционалниот модел на апликации за запознавање, во кој корисниците првенствено разменуваат пораки и договараат состаноци „еден на еден“. Компанијата смета дека групното излегување може да понуди поопуштена алтернатива на класичниот состанок меѓу двајца поединци.

Новата функција постепено се воведува во САД и на одредени други пазари, со планови за проширување и во други земји.

Tinder ја воведува оваа нова стратегија во услови на пад на бројот на корисници. Во вториот квартал од 2026 година, компанијата остварила приход од приближно 457 милиони долари – што претставува пад од еден отсто на годишно ниво – додека бројот на дневни активни корисници се намалил за четири отсто.