Поранешниот крал на интернетот, Yahoo, официјално влезе во трката за вооружување со вештачка интелигенција со воведувањето на својот нов адут, Scout.


Во време кога Google и Microsoft доминираат на пазарот за пребарување, Yahoo одлучи да го потсети светот на своето постоење. Компанијата го лансираше Scout, нов answer engine „мотор за одговори“ кој користи генеративна вештачка интелигенција за да го трансформира начинот на кој ги консумираме информациите.

Scout не е само класичен пребарувач. Наместо да фрла бесконечен список на линкови низ кои можете сами да се движите, оваа алатка функционира како паметен асистент. Го анализира интернетот во реално време и создава уникатен, текстуален одговор кој ги сумира сите најважни факти.

Она што го издвојува Scout од конкурентите како ChatGPT или Perplexity е неговата длабока интеграција во екосистемот на Yahoo. Ако ја следите берзата преку Yahoo Finance или користите Yahoo Mail, Scout ќе може да ги анализира вашите податоци (со дозвола) и да ви обезбеди персонализирани сознанија што обичните прелистувачи не можат.

Интересно е што Yahoo не измисли топла вода кога е во прашање самиот AI модел. Тие ги здружија силите со компанијата Anthropic, а Scout го придвижува моќниот модел Claude. API-то на Microsoft Bing се користи за веб-индексирање и точност на информациите, што гарантира дека податоците се секогаш свежи.

Фокусот е ставен и на визуелизацијата, па Scout често ги придружува одговорите со графикони, табели и слики, што е во согласност со современите трендови каде што корисниците сакаат информации „на послужавник“ и што е можно поскоро.

Секој одговор што Scout го генерира содржи јасни цитати и врски до оригинални извори, што охрабрува посета на страниците што ја создале содржината.

Извршниот директор на Yahoo, Џим Ланзон, истакнува дека ова е нов почеток за компанијата што е синоним за интернет со децении.

Scout моментално е достапен во бета верзија за корисниците во САД и се очекува да стане достапен и за остатокот од светот во текот на годината.