Возило што наликува на амбулантно возило – но е наменето исклучиво за хуманоидни роботи – наскоро би можело да се види на улиците на Токио.


Јапонската технолошка групација „GMO Internet Group“ претстави комбе опремено за транспорт на инженери, алат, резервни делови и заменски робот директно до местото каде што настанал дефект. Компанијата истакнува дека ова е првото возило од ваков вид во Јапонија наменето за одржување на хуманоидни роботи, пренесува „Euronews“.

„Нашата амбуланта за роботи носи заменски робот на лице место за да го замени оштетениот“, објасни Шота Такизава, инженер во компанијата „GMO Air“. Доколку проблемот не може да се реши на самото место, оштетениот робот се превезува во сервисен центар. Во меѓувреме, заменскиот робот веднаш ги презема неговите задачи, обезбедувајќи непречено работење.

Решение поттикнато од лично искуство
Од „GMO Air“ објаснуваат дека ја развиле оваа услуга откако се соочиле со прекини во работењето додека чекале поправка на сопствените роботи.

„Тоа искуство ја поттикна идејата за обезбедување заменски хуманоидни роботи“, изјави Томохиро Учида, извршен директор на „GMO Air“.

Мобилна работилница и идни планови
Иако возилото има ознаки слични на оние на возило на брза помош и е опремено со виолетови ротирачки светла, тоа всушност претставува мобилна работилница. Внатрешноста е уредена така што може да прими роботи, лаптопи и сета неопходна опрема за одржување.

Компанијата моментално располага со едно вакво возило во своето седиште во Токио, но GMO најави планови за воведување дополнителни возила и отворање нови бази доколку се појави потреба за тоа. „Кога хуманоидните роботи ќе станат дел од секојдневниот живот, ваквата услуга ќе биде од суштинско значење“, додаде Такизава.