Сидни Свини во последен момент исчезна од „Ѓаволот носи Прада 2“ без објаснување?

Камео улогата на една од најпопуларните млади актерки денес, Сидни Свини, е отстранета од финалната верзија на долгоочекуваниот филм „Ѓаволот носи Прада 2“, што предизвика изненадување кај фановите.

Продолжението на култниот филм, кое доаѓа речиси 20 години по оригиналот од 2006 година, ги враќа главните ѕвезди – Мерил Стрип, Ен Хатавеј, Емили Блант и Стенли Тучи – додека приказната повторно го следи светот на модата инспириран од романот на Лорен Вајсбергер, базиран на нејзиното искуство со Ана Винтур.

Според информации од извори блиски до продукцијата, причината за отстранувањето на Свини е „креативна одлука“. Нејзиното појавување било планирано како кратко камео на самиот почеток на филмот, но на крајот сцената била исечена бидејќи „структурно не се вклопувала“ во приказната.

Во сцената, која траела околу три минути, Свини требало да глуми позната клиентка на ликот на Емили Чарлтон (ја игра Емили Блант), а истата служела како вовед во тоа каде се наоѓа ликот на Емили денес.

Сценаристката Алин Брош Мекена индиректно го потврди ова во интервју, изјавувајќи: „Па, го гледавте филмот. Таа не е во него“, со што практично беше потврдено дека сцената не влегла во финалната монтажа.

Иако извештаите се прилично јасни, ниту Свини ниту компанијата Дизни засега официјално не ја коментирале ситуацијата.

Во исто време, Свини е во центарот на вниманието и поради својата улога во третата сезона на серијата „Еуфорија“, каде нејзиниот лик Кеси Хауард е прикажан во нова, контроверзна фаза од животот.

Дејството на новата сезона се одвива пет години по завршувањето на средното училиште, а ликот на Кеси започнува да заработува преку платформата Онлифенс. Токму типот на содржина што го објавува предизвика дебати во јавноста, особено поради поексплицитните сцени.

Сепак, контроверзиите не изгледа дека имаат негативно влијание врз нејзината кариера. Актерката веќе се подготвува за нов проект – продолжението на успешниот филм „Куќната помошничка“, насловено „Тајната на куќната помошничка“, кој беше голем бокс офис успех.

Филмот „Ѓаволот носи Прада 2“ пристигнува во кината на 1 мај, а и покрај исфрлената сцена со Свини, интересот за продолжението останува огромен.

Иако нејзиното појавување беше кратко, фактот дека е отстранета од финалната верзија отвора прашања за креативните одлуки зад сцената – и покажува дека дури и најголемите ѕвезди не се гаранција за место во последниот кадар.