пред 3 години 
Италијанецот Југослав Јовановиќ е осуден на 11 години затворска казна за провала и грабеж во домот на Тамара Еклстоун, ќерката на поранешниот прв човек на Формула 1, Берни Еклстоун.
Југослав заедно со Алесандро Малтесе и Алесандро Донати признале дека провалиле во домот на богатата наследничка, пишува „Би-би-си“. Тие провалиле во ноември и декември во 2019 година во нејзината луксузна вила во лондонскиот елитен кварт Кенсингтон.
Од куќата украле предмети во вредност од 25 милиони фунти. Тие провалиле и во домот на поранешниот фудбалер на Челзи, Франк Лампард и сега веќе покојниот сопственик на фудбалскиот клуб на Лестер, Вишаи Шриваданапрабха.
Тамара во тој период била на одмор во Финска со нејзиниот сопруг Џеј Рутланд и ќерката Софија. Полицијата не успеала да го врати накитот и кешот од ниту еден од грабежите, а се претпоставува дека украдените предмети крадците ги изнеле во странство.
Освен за грабежот, Југослав ја призна вината и за перење на пари во периодот од 10 декември 2019 година, до 31 јануари 2020 година. Судијата Мартин Едмундс го осуди на 11 години затвор, додека Малтесе и Донати ќе лежат осум години и девет месеци.