Почина еден од основачите на „Дивље јагоде“ – регионот се простува од рок легенда

Рок сцената во регионот е во жалост по веста дека почина Нихад Јусуфходжиќ, еден од основачите на култниот бенд Divlje Jagode, кој остави длабок траг во музиката на поранешна Југославија.
Музичарот починал на 15 април во Бихаќ, на 72-годишна возраст, по повеќемесечна борба со болест, за време на која бил хоспитализиран во кантоналната болница.

Неговата состојба била позната во јавноста, а граѓаните во Бихаќ дури организирале и акции за доброволно дарување крв во обид да му помогнат во лекувањето.

Веста за неговата смрт предизвика силни реакции кај колегите и обожавателите, кои преку социјалните мрежи се простуваат од него и се присетуваат на заедничките моменти. Особено емотивна порака испрати неговиот долгогодишен соработник Анте Јанковиќ, кој истакна дека изгубил не само колега, туку и пријател со кој делел дел од животот и музичката сцена.

Нихад Јусуфходжиќ беше дел од основачката постава на бендот „Дивље јагоде“, формиран во 1977 година, заедно со Сеад Липовача и Анте Јанковиќ.  Со нив учествуваше во создавањето на првите синглови и дебитантскиот албум, со кои бендот го започна својот подем и стана еден од симболите на рок музиката во регионот.

Во текот на својата кариера, тој беше препознатлив како бас-гитарист и дел од генерацијата која го постави темелот на хард рок и хеви метал сцената на Балканот.
Неговата смрт остави празнина во музичките кругови, а многумина го опишуваат како човек кој зад себе остави не само музика, туку и силно пријателство и влијание врз генерации музичари.

Со заминувањето на Јусуфходжиќ, регионот изгуби уште една значајна фигура од златната ера на рокот, чие дело ќе продолжи да живее преку песните и наследството што го остави зад себе.