Хрватскиот актер Горан Богдан на отворањето на седмото издание на Киненова

По две години хибридно издание на меѓународниот филмски фестивал Киненова, седмото издание се враќа со филмски премиери во кино салите.

Хрватскиот актер Горан Богдан ќе биде гостин на отворањето на Киненова и двајцата млади режисери кои се потпишуваат на филмот „Чичко“ со кој започнува официјалната програма на фестивалот.

Главната селекција на фестивалот содржи осум филмови. Отворањето ќе биде на 7 ми октомври во кино Милениум, со хрватскиот филм „Чичко“ на двајцата млади режисери Давид Капац и Андрија Мардешиќ.

„Останатите седум филмови се од различни кинематографии од Србија, Косово, Романија, Полска и еден документарен филм од Италија. На фестивалот ќе има споредни програми со кои се задржува сензибилитетот на фестивалот. Филм на Австриецот Михаел Ханеке и „Режисерот во фокус“, чии први три филмови го трасираа неговиот пат до европскиот и светски врв, потоа, изборот на филмови од актуелната португалска и ирска кинематографија, како и соработката со полскиот фестивал „Вистула““, изјави за Репортер селекторот на фестивалот, Игор Анѓелков.

Киненова изминатите години беше домаќин и на бројни актерски имиња како Мира Фурлан која беше гостинка на првото издание на фестивалот. Меѓу другите беа Бранка Катиќ, Жарко Лаушевиќ, како и српскиот режисер Горан Марковиќ. Покрај актерот Горан Богдан, оваа година гостинка ќе биде и унгарската режисерка Илдико Енједи.

„Добитникот на највисоката награда на фестивалот за особен придонес во филмската уметност е најзначајната и големата унгарска режисерка во моментов Илдико Енједи. Таа ќе има свој мастерклас во Кинотека на Македонија, тоа е стручен мастерклас пред се за филмските професионалци и автори, но ќе биде отворен за широката јавност“, рече директорот на МФФ Киненова, Небојша Јовановиќ.

Илдико ќе сподели филмски искуства за снимањето на победникот на Берлиналето во 2017 година, филмот „За душата и телото“, финалист и за Оскар.

За филмски имиња да бидат гости на фестивалот потребен е голем ангажман, но и желба да бидат гости.

„Имаат голема желба да дојдат, но кога станува збор за големи професионалци, барани и славни, тоа може тешко да се усклади со нивната агенда. Тоа е голем работа да се натокмат датумите и периодот и тоа се месеци, месеци преговарање. Потребно е многу трпение, љубов и ентузијазам, ние со доста мали симболични ресурси го правиме фестивалот“, рече директорот на Киненова.

Филмскиот фестивал започнува од 7 до 14 октомври, проекциите ќе се одржат дел во Кинотеката, дел во кино Милениум, а билетите ќе бидат по цена од 100 денари.

Габриела Додевска