(Видео) Македонското продуцентско трио „Би-Ди-Ем“ промовира песна пред Нова година

Македонското продуцентско трио „Би-Ди-Ем“, односно Бранко и Дуле Вељановски и Мартин Делимитов денес го промовира шестиот сингл, песната Stay, која е во соработка со Јова. Ова е нивни втор заеднички проект, откако во летото 2018 година ја направија песната Lee. Покрај македонската, песната Stay ќе има и светска помоција на најголемите музички платформи, Amazon, Spotify, Deezer, iTunes и други.

„Среќни сме што повторно ни гостува Јова со нејзиниот уникатен сензибилитет и глас што ја носи песната на друго ниво. Овој сингл ни е посебно драг, не само затоа што е сосема поразличен од останатите наши синглови, туку и затоа што најемотивната песна што досега сме ја направиле“, велат момците од бендот.

Истовремено, тие го промовираат и спотот, кој во црно-бела техника целосно го изработи Виктор Стоимиров, а главната улога ја има Христина Јанеска.

Од „Би-Ди-Ем“ најавија дека на почетокот на 2021 година ќе излезе и ремиксот за Stay, а го работат со холандскиот продуцент Марко.

„Овој синлг ќе се издава премиерно и во Холандија. Нестрпливи сме и едвај чекаме да го издадеме и ремиксот“, додаваат момците.

Новата песна, како и претходните, е испеана на англиски јазик и е во издание на Paragon Record Label. Музиката, аранжманот и текстот ги направија „Би-Ди-Ем“. Синглот ќе се најде на албумот State of Mind на кој работат во моментов.