Бајден го повика Фаучи да биде дел од неговиот тим

Новоизбраниот претседател на САД, Џо Бајден, рече дека го повикал водечкиот американски инфектолог Ентони Фаучи да продолжи да ја извршува својата работа и да биде главен медицински советник во тимот на новата администрација за борба против Ковид-19.

„Го замолив да остане на истата позиција што ја извршуваше за последните неколку претседатели и го замолив да ми биде главен медицински советник, како и дел од тимот за борба против Ковид“, за „Си-ен-ен“ изјави Бајден, кој со новата администрација стапува на должност на 20 јануари.

Тој исто така рече дека вакцината ќе ја прими кога Фаучи ќе каже дека е безбедна и додаде дека ќе се вакцинира јавно, пренесува „Ројтерс“.