Алжир користи боева муниција на воените вежби на границата со Мароко и Западна Сахара

Алжирската телевизија во понеделникот емитуваше сцени од огромните копнени и воздушни воени маневри со користење боева муниција во пограничната област Тиндуф, во непосредна близина на Мароко и Западна Сахара, под надзор на началникот на Генералштабот, Саид Ченгриха, пренесува „Мидл Ист монитор“.

Маневрите „Ал-Хазм 2021“ се одржаа на вториот ден од посетата на началникот на Генералштабот за да се изврши увид во подготвеноста на воените единици и надградба на борбените способности на силите стационирани на западните граници на земјата.

Алжирското Министерство за национална одбрана соопшти дека овие воени вежби, кои биле изведувани со употреба на боева муниција и се прикажувале 15 минути на алжирската јавна телевизија, се дел од евалуацијата на првата фаза од програмата за борбена готовност за 2020-2021 година.

Министерството посочи дека маневрите имаат за цел да обезбедат подобрување и надградба на оперативните перформанси и борбените вештини за сите армиски формации и компоненти со цел да се подигне нивото на подготвеност на војниците за сите потенцијални предизвици.

Алжирското Министерство за одбрана соопшти дека овие воени вежби биле спроведени со голем професионализам во сите фази и на високо тактичко и оперативно ниво.

Воените вежби се совпаднаа со присуството на руските воени поморски единици во Алжир, кои се состојат од фрегата, локомотива и брод за полнење гориво, кои, според Министерството, биле на техничка пауза во период од три дена како дел од активностите за воена соработка меѓу двете земји во областа на одбраната.

Овие маневри доаѓаат во светло на ескалацијата на напнатоста во овој дел на Северна Африка по кризата Гергуерат во Западна Сахара и враќањето на Фронтот Полисарио во вооружена акција против Мароко, за кого тврдат дека е колонијална моќ што ги окупира нивните територии.

Тука е и воспоставувањето официјални односи меѓу Рабат и Тел Авив во замена за признавање на суверенитетот на Мароко над Западна Сахара од страна на Вашингтон, што претставува кршење на меѓународното право и резолуциите на ОН.