Џон Тери си замина од Астон Вила

Астон вила потврдија дека нивниот помошник тренер Џон Тери го напушта тимот на Дин Смит, во обид да најде самостојна менаџерска работа.

Тери, кој е жива легенда на Челси беше поврзуван со повеќе позиции во минатото, и сега според англиските букмејкери е прв фаворит за местото во Свонси.

„За мене беше огромна чест и привилегија да поминам три години во Астон вила, но мислам дека сега е вистинско време да одам понатаму. Сакам да ја искажам својата огромна почит кон клубот и кон менаџерот. Сега, првиот план е да поминам време со семејството, а потоа да почнам во потрага за клуб“, вели Тери.

40-годишниот Тери помина една сезона во Вила како фудбалер во 2017/18, кога клубот загуби во плејофот за влез во Премиер лигата од Фулам. Потоа тој се пензионираше и беше именуван за помошник на Смит.