Лефков: Власта на Заев дозволи криминалците наместо во затвор, да бидат на слобода и да хараат низ Македонија

Пратеникот од ВМРО-ДПМНЕ, Миле Лефков, денеска на прес-конференција обвини дека на местото на сообраќајната несреќа што се случи вчера пред Стража, стигнале вработени во Агенцијата за национална безбедност за кои има сведоштва дека се обидувале да прикријат информации за сообраќајката.

Во однос на тоа што еден од учесниците во несреќата бил Зоран Милевски-Кичеец кој е осуден во „Рекет“, Лефков вели дека наместо во затвор тој бил на слобода и учествувал во сообраќајна несреќа со фатални последици што значи дека „Зоран Заев е во брак со подземјето“.

„Фактот што е на слобода Зоран Милевски Кичеец кој учествувал во сообраќајната несреќа, власта го правда со контрадикторни изјави. Еднаш велат дека тој е на слобода поради здравствени проблеми, после тврдат дека тоа е поради семејни причини. Очигледно дека власта на Заев се обидува нешто да забошоти и нешто да прикрие. Кој ќе сноси одговорност за ова, прашуваме? Заев? Маричиќ? МВР на Спасовски? Или АНБ? Две лица загинаа во сообраќајната несреќа, а шест се повредени. Сведоци сме дека на слобода се пуштени и други лица од подземјето, што говори дека овие лица ќе бидат искористени од страна на Заев за претстојните избори, и тоа ќе бидат искористени да вршат поткуп, притисоци и заплашувања на граѓаните со една единствена цел, а тоа е да го ублажат поразот на СДСМ“, додаде Лефков.

Тој рече дека за да се спаси Македонија од криминал Заев треба да биде поразен.