пред 11 месеци 
Koсовскиот премиер, Албин Курти, синоќа на средба со високиот претставник на Европската Унија за надворешна политика и безбедност, Жозеп Борел и со претставникот на ЕУ за дијалогот меѓу Белград и Приштина, Мирослав Лајчак, во Минхен повторно побара да се потпишат договорите постигнати во Брисел и Охрид и ЕУ да ги укине мерките против Приштина.
Во соопштението на кабинетот на Курти, се наведува дека потпишувањето на Основниот договор постигнат во Брисел и неговиот анекс договор во Охрид е неопходен како „гаранција за нивно целосно почитување и спроведување“.
За време на разговорите на маргините на Минхенската безбедносна конференција, Курти повторно го обвини Белград за кршење на тие договори, јавуваат приштинските медиуми.
Тој исто така рече дека „мора да се отстранат неправедните рестриктивни мерки воведени од Европската унија“.
Во соопштението се наведува дека на средбата се разговарало за процесот на дијалог, спроведувањето на договорите и нормализацијата на односите меѓу Белград и Приштина.
Текстот Курти побара од ЕУ да ги укине мерките за Приштина е превземен од МАКФАКС.