(Видео) Заев на отворањето на „Интернационал Фреш Фуд“: За прв пат во земјава ќе има сериозно производство на домашно пилешко месо

„Сопственото производство на храна е од голема важност за секоја држава. Кризата со пандемијата на корона вирусот го покажа тоа. Во таа насока се и заложбите на Владата во создавање на што поповолни услови за земјоделско-сточарското производство“, порача премиерот Зоран Заев на отворањето на новата инвестиција на конзорциумот на домашни и странски инвеститори „Интернационал фреш фуд“ во селото Гиновци, општина Ранковце.

Станува збор за инвестиција по највисоките европски стандарди со фокус на модерно производство на свежо пилешко месо и амбициозен план за изградба на фарми, кланици и хали низ целата држава.

„За прв пат во земјава ќе има сериозно производство на домашно пилешко месо со запазување на најсовремените пракси за безбедност на храна. На овој начин не само што ќе имаме намалување на увозот на свежо пилешко месо во земјава, кој во моментот изнесува 95% од домашната потрошувачка, туку и се отвора можност за да извезуваме надвор на странските пазари. Планот на инвеститорите кој имавме можност да го слушнеме е создавање на затворен круг на производство со сите потребни компоненти почнувајќи од матичните јата, инкубаторски станици, еднодневни пилиња, храна, сопствени фарми, модерна кланица па се до финален производ. Сето ова ќе се инвестира во нашата татковина, во повеќе региони. Покрај тука во Гиновце и во Врапчиште – Гостиварско, Кочани, Штип, Охрид, Струга, Ветуница, Карбинци, Свети Николе. Тоа значи и отворање на повеќе од 3000 нови работни места во оваа бранша и дополнително раздвижување на соработката со кооперанти и домашни производители на репроматеријали“, изјави премиерот Заев.

Заев ги охрабри инвеститорите да ги следат трендовите, да ги искористат ресурсите кои ги имаме во земјата, бидејќи имаме потенцијал за развој во повеќе сектори, на производи и услуги со повисока додадена вредност, подготвени за извоз.

На стартот на новата инвестиција беа присутни и Љупчо Николоски, заменик на претседателот за борба против корупцијата и криминал, одржлив развој и човечки ресурси, Артан Груби, прв заменик на претседателот и министер за политички систем и односи меѓу заедниците, Фатмир Бесими, министер за финансии, Крешник Бектеши, министер за економија и Арјанит Хоџа, министер за земјоделство, шумарство и водостопанство.

Абдулезел Догани од „Интернационал Фреш Фуд“ истакна дека покрај придонесот за намалување на увозот на свежо пилешко месо во земјава, ќе се зголеми и извозот на странските пазари земајќи предвид дека еден од партнерите на инвестицијата е носител на франшизата за КФЦ за балканските земји, што претставува основа за пласман на производите за КФЦ, не само на Балканот, туку и во Европа.

„Сакам да се заблагодарам на Владата со сите инволвирани институции како на централно, така и на локално ниво која во нашиот конзорциум препозна свој доверлив партнер и одговорна компанија. Благодарност за поддршката во насока на подобрување на конкурентноста на домашниот, но и на меѓународните пазари, што резултира нашите македонски производи да бидат препознатливи и синоним за квалитет“, изјави Догани.

Севкупно планираната инвестиција за следните 5 години ќе надмине сума од 50 милиони евра.