Фановите на Њукасл сонуваа за Мбапе, ќе го добијат Игало?

Иако сите очекуваат Њукасл јунајтед да биде најактивниот фудбалски клуб во јануарскиот преоден рок финансирани од новите саудиски газди, навивачите се разочарани од последното име кое се поврзува со трансфер – нигерискиот напаѓач Одион Игало.

Поранешниот фудбалер на Манчестер јунајтед, во моментов игра во Ал-Шабаб во Саудиска Арабија, и според „Скај спорт“, нема да постои проблем тимот на Еди Хоув да го добие засилувањето во нападот за борбата за опстанок.

32-годишниот Игало играше за Вотфорд во Премиерлигата, пред да направи трансфер во кинескиот Шангај Шенхуа, пред минатата година шокантно да се врати во Англија кај „ѓаволите“ со 18-месечна позајмица. Игало сега е најдобриот стрелец во Саудиската професионална лига со 9 гола, а неговиот договор истекува во 2023.