Фирмино ги „урна“ Тотенхем – Ливерпул е лидер во Англија

Роберто Фирмино со гол во 90-тата минута донесе 2:1 победа на Ливерпул во дербито против Тотенхем за искачување на првото место во Премиер лигата за актуелните шампиони, во меч во кој Тотенхем немаа ниту 30 отсто од поседот на топката, но за малку ќе си заминеа со поен.

Мохамед Салах во 26. минута со малку среќа успеа да го совлада Иго Љорис откако „црвените“ притиснаа од почеток, но Спарси бргу вратија во 33. минута преку Сон Хеунг-Мин со нивниот единствен удар на голот во првото полувреме. Второто полувреме почна со мала иницијатива на Тотенхем, кои беа подобри во првите десетина минути, но потоа повторно помина во знакот на Ливерпул, додека Тотенхем беа задоволни да седат длабоко во својата половина и да чекаат шанса за контра, која не дојде.

Притисокот на Ливерпул на крај се оствари кога по корнерот на Хендерсон, Фирмино го натскока Алдервајрелд и донесе победа за тимот на Јирген Клоп. Ливерпул сега се први на табелата со 28 поени, три повеќе од Тотенхем и четири пред Саутемптон на третото место.

ПРЕМИЕР ЛИГА, 13.КОЛО

Ливерпул – Тотенхем 2:1

Фулам – Брајтон 0:0

Вест хем – Кристал палас 1:1