Американски претставници ги бојкотираат Зимските олимписки игри во Пекинг

Претставници на американската влада ќе ги бојкотираат Зимските олимписки игри во Пекинг во 2022 година поради кинеските злосторства за човековите права, соопшти Белата куќа, само неколку недели по разговорите кои имаат за цел да ги смират тензичните односи меѓу двете сили.

Дипломатскиот бојкот, кој им остава слобода на спортистите да патуваат во Пекинг на натпревари, беше охрабруван со месеци од некои членови на Конгресот и групи за човекови права.

Пекинг се закани со неодредени одлучни контрамерки против секој таков потег, што сигурно дополнително ќе ги заострува односите, кои веќе се на најниска точка во последните децении.

Администрацијата на претседателот Џозеф Бајден го истакна она што Вашингтон го вели е геноцид врз малцинските муслимани во западниот кинески регион Ксинџијанг. Кина негира каква било злоупотреба на правата.

„ Американските дипломатски претставништва или официјални мисии би ги третирале овие игри како нормална работа, но соочени со невидени прекршувања на човековите права и злосторства во Ксинџијанг, едноставно не можеме да го сториме тоа“, рече секретарот за печат на Белата куќа Џен Псаки, додавајќи дека американските спортисти имаат целосна поддршка.

„ Ќе бидеме 100 проценти зад нив додека ги поддржуваме дома“ нагласи Псаки.

Кинеската амбасада во Вашингтон го нарече бојкотот „политичка манипулација“ која нема да влијае на Олимписките игри бидејќи не била испратена покана до американските политичари. Рускиот претседател Владимир Путин е единствениот лидер на голема земја кој ја прифати поканата.