Германија ја предупреди Русија дека ќе се соочи со низа санкции

Шефот на германската дипломатија Аналена Бербок ја повика Москва да не ја ескалира ситуацијата со Украина.

Таа ги предупреди дека ќе се соочи со низа санкции доколку тензиите дополнително ескалираат.

„ Итно бараме Русија да преземе чекори кон деескалација. Секое понатамошно агресивно однесување или агресија би резултирало со сериозни последици“, рече Бербокова на заедничката прес-конференција со американскиот државен секретар Ентони Блинкен, пренесе „Ројтерс“.

„ Ова не е ништо помалку од прашање на одржување на мирот во Европа. За нас тоа е егзистенцијално“, истакна таа.

Блинкен рече дека САД и нивните европски сојузници ќе претставуваат обединет фронт, доколку Русија продолжи да дејствува против Украина.

Според него, Москва ќе добие брзи и сериозни обединети одговори доколку нејзините сили преминат во Украина.

Дополнително, Вашингтон и неговите партнери ќе презентираат унифициран одговор во случај на воведување санкции и ќе работат на координиран одговор на какви било дестабилизирачки дејства на Русија, посочи Блинкен.