Девет лица загинаа во напад на автобус во Сирија

Најмалку девет лица загинаа во неделата во терористички напад врз автобус во сириската провинција Хама, објави весникот „Ал Ватан“ повикувајќи се на воен извор.

Според изворот, милитантите нападнале патничко возило на автопатот Саламија-Рака.

Според веб-порталот „Ал-Масдар“, вооружен напад бил изведен од банда која дејствува во оваа област, која е дел од екстремистичката Исламска држава. Сириските војници кои пристигнале на местото на настанот трагаат по милитантите.

На 30 декември, друга банда на ИД нападна патнички автобус на автопатот Палмира-Деир ез-Зор, што резултираше со 25 жртви и 13 повредени, кои подоцна биле хоспитализирани во Деир ез-Зор.

Терористите забележително ги засилија своите напади од почетокот на декември во триаголникот на раскрсницата на провинциите Алепо, Хама и Рака. Командата на сириските вооружени сили таму распореди засилувања, што им помогна на владините сили да ја задржат контролата врз стратешкиот автопат до Алепо. За време на борбите биле убиени 39 милитанти.