Навални ги повика Русите на антивоени протести

Рускиот опозициски лидер Алексеј Навални повика од затвор на антивоени протести во Москва и другите руски градови во недела, 13 март, пренесуваат агенциите.

Во пораката на својот Инстаграм профил, Навални наведе дека, како што рече, „лудиот манијак Путин“ најбрзо ќе запре доколку народот на Русија се спротивстави на војната, пренесуваат агенциите.

„Морате да одите на антивоени собири секој викенд, дури и ако изгледа дека сите или побегнале или се исплашиле. „Вие сте столбот на движењето против војната и смртта“, рече Навални.

Групата за мониторинг на протестите ОВД Инфо соопшти дека 13.908 луѓе биле приведени во антивоените демонстрации во Русија од 24 февруари, кога Москва започна инвазија на Украина.

Навални, најистакнатиот критичар на Кремљ, беше затворен минатата година откако се врати во Русија од Германија, каде што се опорави од, како што покажаа западните лабораториски тестови, обидот да го отруе со нервен агенс во Сибир. Русија негираше таков напад.

Навални може да објавува затворски објави на социјалните мрежи преку своите адвокати и сојузници.