Огромен пожар во рафинерија за нафта во Индонезија, евакуирани 950 лица

Индонезиската државна нафтена компанија „Пертамина“ утрово објави дека се обидува да го контролира пожарот што избувна во нејзината рафинерија во Балонган и дека пет лица се повредени во пожарот, а околу 950 се евакуирани.

Пожарот започна синоќа по полноќ, објавија медиумите, а на социјалните мрежи беа објавени видеа на кои се гледа како голем пламен ја зафаќа рафинеријата и се слуша експлозија.

BREAKING: Adding to global energy sector chaos caused by #SuezBLOCKED, there has been a *massive* explosion & fire at Indonesia’s Pertamina Balongan mega-refinery in West Java.

h/t @JeffSchogol pic.twitter.com/afmFHUCOFp

— John Scott-Railton (@jsrailton) March 28, 2021

Од „Пертамина“ велат дека пожарот во рафинеријата, кој може да преработува 125.000 барели на ден, се случил за време на лоши временски услови.

„Причината за пожарот е непозната, но имаше силен дожд и молња за време на инцидентот“, забележаа тие.

Портпарол на компанијата изјави дека петмина жители се лекуваат во болницата поради изгореници.

Државната компанија за нафта соопшти дека ја затвора рафинеријата и спроведува контрола на протокот на нафта за да се спречи понатамошно ширење.

Тие истакнаа дека снабдувањето со гориво не е нарушено поради пожарот.