Шведска препорачува четврта доза вакцина за постари лица

Шведската здравствена агенција објави дека луѓето на возраст од 80 и повеќе години треба да добијат втора дополнителна доза на вакцина против коронавирус, или вкупно четири дози вакцина за зајакнување на имунитетот во услови на брзо ширење на омикрон сојот.

Препораката важи и за лицата кои живеат во домови за стари лица, како и за оние кои живеат дома, но ги посетува стручен кадар кој им помага во секојдневните активности.

Втората бустер доза треба да се администрира не порано од четири месеци по првата бустер доза, се вели во соопштението на здравствената агенција.

Шведска забележа рекорден број на нови инфекции претходно оваа година, што се препишува на брзото ширење на омикронот.

Тамошните власти планираат да ги отстранат ограничувањата и да ги намалат тестирањата веќе овој месец, потпирајќи се на засилувачките дози, како и на фактот дека омикрон предизвикува поблаги симптоми, што го намалува притисокот врз здравствениот систем.

Но, инфекцијата сè уште се шири. Здравствената агенција известува дека во последните недели има зголемен број на случаи меѓу групите со зголемен ризик од развој на потешки форми на болеста, како што се луѓето кои живеат во домови за стари лица.

„Зголемената доза ја подобрува заштитата. Затоа веруваме дека луѓето на возраст од 80 години и постари ќе имаат корист од втората засилена доза“, рече шведскиот главен епидемиолог Андерс Тегнел.