Доктори ги советуваат верниците со дијабетес тип 1 да не постат за време на рамазан

Рамазан, периодот во кој муслиманските верници постат од изгрејсонце до зајдисонце, започна на 2 април. Што значи ова за дијабетичарите кои треба да го задржат шеќерот во крвта под контрола? Дали лекарите мислат дека овие лица можат да практикуваат постење? Одговорот зависи од типот на дијабетес.

Дијабетесот е доживотна здравствена состојба која предизвикува високи нивоа на шеќер во крвта. Постојат два главни типа на дијабетес – дијабетес тип 1 и дијабетес тип 2.

Кај дијабетес тип 1, имунолошкиот систем на телото ги напаѓа клетките што произведуваат инсулин, а дијабетес тип 2 е состојба во која телото не произведува доволно инсулин, што предизвикува клетките да не реагираат правилно.

Постот за време на рамазан не се препорачува за луѓе со дијабетес тип 1, вели диететичарката Несрин Јавуз во преглед во германскиот магазин за фармацевти.

Ова важи и за оние со оштетувања на бубрезите и за луѓето кои земаат апчиња поради болест, вели Јавуз, членка на работната група за дијабетес и мигранти, која е дел од германското Здружение за дијабетес.

Муслиманите со хронични болести како што е дијабетесот се ослободени од обврската за пост, иако многумина, сепак, сакаат да учествуваат во рамазанскиот пост. Оние со дијабетес тип 2 може да размислат за постење, но треба да бидат особено внимателни во конкретни случаи.

„Дури и за луѓето кои не си инјектираат инсулин, важно е да имаат добри долгорочни нивоа на гликоза во крвта“, вели Јавуз. Оние кои инјектираат инсулин мора да бидат особено внимателни бидејќи во спротивно може да развијат тешка хипогликемија.

На сите дијабетичари им се советува да разговараат со својот лекар пред да почнат да постат за да го процени нивното општо здравје, постоечката терапија, ризиците од постот и да им помогне во креирањето на план за исхрана. Задолжително е и редовно мерење на нивото на шеќер во крвта.