Русија постигна договор за истражување на планетата Венера во заедничка мисија со САД, изјави шефот на руската вселенска агенција Роскосмос, Дмитриј Рогозин.

„Со Американците се договоривме за заедничка мисија на Венера“, рече Рогозин, додавајќи дека заедно полесно ќе го прифатат предизвикот и од економска и од техничка гледна точка.

„Ваквите проблеми полесно се решаваат заедно со користење на талентите на нашите научници“, рече Рогозин, но не прецизираше кога мисијата би можела да биде лансирана.

Најблискиот планетарен сосед на Земјата, Венера е слична по големина на нашата планета, но нејзината површина е обвиткана со густи облаци, а поради катастрофалниот ефект на стаклена градина на површината е неколку стотици степени Целзиусови.

Русија првично најави мисија на Венера минатата година, со прелиминарни датуми на лансирање помеѓу 2027 и 2029 година. Неодамна, Обединетите Арапски Емирати, исто така, објавија намера да ја истражат планетата.

Извор: Index.hr