(ВИДЕО) Софија во еуфорија: ДАРА пречекана на црвен тепих како национален херој по победата на Евросонг

Софија во еуфорија ја пречека ДАРА: Илјадници Бугари славеа историска победа на Евросонг

Главниот град на Бугарија приреди спектакуларен пречек за бугарската пејачка ДАРА, која ја донесе првата победа за земјата на Евросонг со песната „Бангаранга“.

Со црвен килим долг 60 метри, огромна толпа луѓе и атмосфера каква што Софија одамна не памети, илјадници граѓани од цела Бугарија излегоа на улиците за да ја поздрават новата европска музичка ѕвезда.

Големата прослава беше организирана од Општина Софија на плоштадот „Књаз Александар I“, каде што ДАРА помина низ насобраната толпа поздравувајќи ги обожавателите, прегрнувајќи деца и млади кои постојано мавтаа со бугарски знамиња.

„Ви благодарам од дното на моето срце, ова многу ми значи. Ќе го чувам овој момент до крајот на мојот живот. Мојот сон беше да можам да ги обединам луѓето и да ве видам сите тука заедно. Ви благодарам што ми го остваривте сонот“, изјави емотивната ДАРА пред насобраните граѓани.

Ова е прва победа за Бугарија на Евросонг откако земјата дебитираше на натпреварот во 2005 година. Бугарија се врати на сцената во 2026 година по четиригодишна пауза предизвикана од финансиски проблеми на јавниот радиодифузен сервис.

Иако песната „Бангаранга“ првично не важеше за главен фаворит, особено во конкуренција со претставниците на Финска и Австралија, бугарската претставничка на крајот убедливо триумфираше.

ДАРА освои вкупно 516 поени од публиката и националните жирија, додека второпласираниот Израел заврши со 343 поени. Со тоа, Бугарија забележа една од најубедливите победи во историјата на Евровизија.

Дополнително, ова е првпат од 2017 година истиот изведувач да освои најмногу поени и од публиката и од стручните жирија.

Песната „Бангаранга“ моментално е на 11-то место на глобалната листа на Spotify, а според бугарските медиуми има реални шанси да се најде и на престижната листа на Billboard.

„‘Бангаранга’ е чувство на сила и надминување на стравот преку посебна енергија. Кога сте во хармонија со природата и светот, тогаш можете да постигнете сè“, изјави ДАРА веднаш по победата.

Честитки до пејачката упатија и бугарскиот претседател Румен Радев, како и градоначалниците на Софија и Варна, Васил Терзиев и Благомир Коцев.

„Бугарија ја чека Европа и светот на Евровизија 2027“, напиша Радев на Фејсбук по историскиот триумф.

Самата ДАРА најави дека следното издание на натпреварот треба да се одржи во Софија.

„Следната година Евровизија доаѓа во Софија и мора да се подготвиме“, изјави пејачката по победата.

ДАРА денес важи за една од најголемите поп-ѕвезди во Бугарија и препознатливо име на модерната балканска музичка сцена. Позната е по хитовите „Thunder“, „Call Me“ и „Mr. Rover“, а во изминатите години беше и ментор во музичкото шоу „The Voice of Bulgaria“.

Нејзиниот албум „ADHDARA“, објавен во 2025 година, се смета за пресвртница во нејзината кариера и почеток на нејзиниот меѓународен пробив.

ВИДЕОТО ПОГЛЕДНЕТЕ ГО ТУКА