На Синиша Михајловиќ му се врати леукемијата по две години

Поранешниот фудбалер и тренер на Болоња, Синиша Михајловиќ, на прес-конференцијата објави дека оди на лекување, оти му се враќа леукемијата. На тренерот на Болоња првпат му беше дијагностицирана леукемија во летото 2019 година, но по хемотерапија и трансплантација на коскена срцевина тој успеа да се опорави. Сега вели дека оди на терапија за да ја уништи болеста која е пак во зачеток.

„Оваа болест е многу храбра штом повторно напаѓа некој како мене. Ако првата лекција не беше доволна, ќе ѝ дадам уште една. Тоа е живот полн со подеми и падови, дупки во кои може да паднете, но мора секогаш да најдете сила повторно да станете“, рече Михајловиќ на пресот.

„Од следната недела ќе бидам примен во клиниката Сант Орсол. Знам дека сум во добри раце. Помирен сум од пред две и пол години. Знам што треба да правам, ситуацијата е поинаква и се надевам нема да трае“, рече Михајловиќ.

Тој додаде дека ќе даде сè од себе за да се врати што е можно поскоро на фудбалот.

„Ќе морам да пропуштам неколку натпревари. Веќе имам сè што ми треба во собата за да можам да ги следам тренинзите и натпреварите. Сигурен сум дека моите момци нема да ме изневерат. Ќе се борам со нив и сигурен сум дека ќе се борат за мене. Би ги замолил навивачите на Болоња да ги поддржат и наскоро ќе се вратам“, кажа тој.