Во Дубровник ќе се отвори првиот геј бар, граѓаните воодушевени оти тие оставале најмногу пари

Во Дубровник ќе се отвори првиот геј бар пред почетокот на летната сезона, пишува „Индекс.хр“. Иако сè уште нема официјална потврда, познато е дека барот ќе го отвораат познати угостители, бидејќи Дубровник е познат како геј-пријателски град. Граѓаните велат дека им се допаѓа идејата и дека тоа ќе донесе нов приход во градот.

Угостителите што планираат да го отворат не сакале да коментираат ништо јавно додека не ги добијат потребните дозволи и почнат со работа, но жителите на Дубровник рекле дека геј-бар во градот ќе биде вистински погодок.

„Имаше толку многу геј лица летово, машки и женски, што не е нормално. Бидејќи јас сум магнет за двата пола, ми се лепеа и едните и другите. Околу 30 отсто од прометот во ресторанот ми беше со нив летово, а тоа не е мала работа. Тие се најдобрите гости во светот, најдобрите потрошувачи, исклучително паметни, интелигентни, пристојни и културни луѓе“, изјавил угостителот Никола Никиќ.

„Лани реков кој прв ќе отвори геј клуб, ќе заработи многу пари. Тоа беше моја идеја, ама ете, приказната очигледно се проширила и сега слушам ќе се отвора геј бар,“ додал Никиќ.

„На Дубровник му треба сè и сешто. Се разбира, додека тоа е направено со вкус и според некои стандарди, не е разврат, не е Содома и Гомора. Дубровник е космополитски град кој е отворен за сите. На крајот на краиштата, Дубровник е еден од ретките градови што дозволи тука да се закотви брод за крстарење за хомосексуалци и мажи и жени. Дубровник имал дури и геј конференции. Сите секогаш биле добредојдени во нашиот град. Мислам дека тоа се културни луѓе, специфични како и сите други. Не гледам проблем во тоа“, рекол Еди Јертец од Дубровник.

Сличен став има и неговата сограѓанка Катарина Дадиќ, која за „Индекс“ вели: „Што се однесува до мене требаше да биде одамна, и други работи, не само геј бар, бидејќи во Дубровник има се повеќе гости кои бараат нешто поинаку. Според мене, тоа е полн погодок. Нè има многу. Имам мои клиенти, верувајте ми, тие се најдобри гости. Велат дека се и најдобри пријатели на жените, па ете, да се увериме“.