(Фото) „Најтажната“ принцеза – На никого не му стои црно како на Шарлин

Принцезата Шарлин од Монако, заедно со сопругот принцот Алберт, ѝ оддаде последна почит на духовната фигура која го обележа модерното време. Во срцето на Ватикан, на плоштадот Свети Петар, присуствуваа бројни светски лидери и членови на кралските семејства, меѓу кои и Доналд и Меланија Трамп, Џо и Џил Бајден, принцот Вилијам, како и францускиот претседател Емануел Макрон со сопругата Брижит.

Шарлин, која и претходно имала средби со папата, со својот изглед оддаде длабока почит кон моментот на жалост. Облечена во едноставен, но софистициран црн миди фустан со долги ракави и кружна крагна, дополнет со класични ниски чевли, таа зрачеше со достоинство и тага. На главата носеше тенок вел од чипка – симболичен гест на почит и скромност.

Поранешната пливачка од Јужна Африка имаше само еден суптилен моден детаљ – елегантна црна чанта од „Прада“, а нејзината појава остави силен впечаток врз сите присутни. Држејќи го за рака принцот Алберт, кој носеше традиционално црно одело и очила за сонце, Шарлин изгледаше како симбол на тишина и длабока лична болка.