Џоркаеф: Цела Франција го мрази ПСЖ

Во интервју за шпанскиот весник „Ел Паис“, легендата на францускиот фудбал, освојувачот на златото од 1998 година, Јури Џоркаеф отворено зборуваше за статусот на неговиот поранешен клуб Пари Сен-Жермен, оценувајќи дека освен страствените фанови, сите други го мразат ПСЖ.

За разлика од другите француски клубови, ПСЖ е релативно нов клуб, основан во 1970 година од група француски бизисмени кои сакаа да направат силен тим од престолнината, а клучен човек во основањето беше и поранешниот претседател на Реал Мадрид, Сантијаго Бернабеу, кој им дал совети за организирање. Тој факт за релативно мала историја, и секако, тоа што доаѓаат од главниот град, го прави тимот омразен кај ривалите.

„Јас бев една година во ПСЖ и имавме добар тим, кој го освои Купот на победниците на купови, прва континетална титула на клубот. Имаше шест-седум репрезентативци. Се сеќавам и кога мојот татко играше таму, тоа беа почетоците на ПСЖ, а ‘Паркот на принцовите’ се градеше тогаш. Мојот брат и јас игравме фудбал на теренот и следниот ден бевме на насловната на ‘Л’Екип’ со порака – ‘Принцовите на Паркот на принцовите’. Таа фотографија секогаш ја носам со мене. ПСЖ е млад клуб, да, но има одлича ДНК и е одлично место за играње фудбал. Но, кога играш за ПСЖ, се бориш против остатокот од Франција. Луѓето навистина го мразат ПСЖ. Шпанија е поделена помеѓу Реал Мадрид и Барселона. Во Франција има луѓе кои го сакаат Олимпик Марсеј, но тие кои не се навивачи на ОМ, не ги мразат, туку не им е грижа. Истото е и со Лион. Но, не со ПСЖ, ПСЖ го мразиш ако не си нивни навивач. Тоа е уникатно“, вели Џоркаеф.